Kitapxana tariyxı
Taxtakópir burınnan belli-belli jıraw-baqsıları, qosıqshıń-oyınshıları, laqqıları, zergerleri, shoyınshı-temirshileri, qolı qúl kesteshi qızları menen at shıǵarıp kiyatırǵan diyar bolıp tabıladı.
Ata-babamızdan miyras boplıp kiyatırǵan ónerlerdi saqlap qalıw, onı taǵı da rawajlandırıw, dástúrlerdi en jaydırıwǵa Ózbekstan Respublikası ǵárezsizliginen soń ayrıqsha itibar berildi.
«Taxtakópir rayonlıq Arxiv bóliminen alınǵan maǵlıwmatlarǵa qaraǵanda, 1949-jıldan baslap «Taxtakópir mádeniy-aǵartıwshılıq bólimi» ataması menen «Ishki buyrıq» kitabı júritilip, 1949-jıldan 1953-jılǵa shekem Berjan Aybosınov basshılıq etken. Sol d.wirde Mádeniyat úyi direktorı Payzullaev, kitapxana direktorı Z. Allamuratovlar tarawları boyınsha jumıs alıp barǵan.
1950-jıǵa kelip «Taxtakópir rayispolkomı janındaǵı mádeniy-aǵartıw bólimi» atamasına ózgertilse, bizlerdiń anıqlawımızsha, 1950-jıl avgust ayınan baslap «Taxtakópir rayispolkomı janındaǵı bilimlendiriw mákemesi atamasına ózgertilgen. Sol jılı 1-marttan baslap kolxozdıń óz investiciyası boyınsha tómendegi kitapxanalar ashılıp, kitapxana baslıqları saylanıp jumıs baslaǵan:
1-awıllıq, keńes izba-chitatel —Abılla Imanov, 2- awıllıq, keńes izba-chitatel — Abdambetov, 3- awıllıq, keńes izba-chitatel — Mamutov, 4- awıllıq, keńes izba-chitatel — Daribaev, 5- awıllıq, keńes awıllıq kitapxana —Oljabay Muratov, 6- awıllıq, keńes izba-chitatel —Q. Qudenov, 7-awıllıq keńes kitapxana —Aybergen, 8- awıllıq keńesi awıllıq kitapxana —Qońırbaev, rayonlıq kitapxana —Tilewxan Qutlıbaev.
1976-1982-jıllarda Taxtakópir rayonı mádeniyat úyi direktorı I. Zulpıxarov, rayonlıq oraylasqan kitapxana direktorı Ziywarxan Akimniyazova óz tarawları boyınsha jumıslar alıp barǵan.
Ziywarxan Akimniyazova – 1979 jılı Tashkent mámleketlik mádeniyat institutınıń bibliograf-kitapxanashı bólimin pitkeredi. Sonnan rayonımızdaǵı oraylasqan kitapxanada kitapxanashı, oraylıq kitapxana baslıǵı lawazımında iskerlik kórsetedi.
Aysánem Alliyarova, 1981 -1985- jılları Tashkent mámleketlik Mádeniyat institutınıń kitapxanashılıq, qánigeligi boyınsha pitkergen. 1985-jıldan baslap miynet jolın 1-sanlı balalar kitapxanasında bas kitapxanashı wazıypasınan baslap, 1987-94-jılları rayon orayındaǵı oraylıq kitapxananıń bas kitapxanashısı, oraylıq kitapxananıń bas metodisti, rayonlıq oraylasqan kitapxananıń direktorı lawazımında islegen.
Házirgi waqıtta 2019-jıl 7-iyundaǵı Ózbekstan Respublikası Prezidentiniń PQ-4354 sanlı qararı tiykarında rayondaǵı “Ǵárezsizlik” MPJ aymaǵında Málimleme-kitapxana orayı bolıp qayta shólkemlestirilip óz iskerligin rayon xalqına málimleme-kitapxana xızmetin kórstip kelmekte. Bul málimleme-kitapxana orayına Zernegúl Ajniyazova basshılıq etpekte.